Сайн байна уу?

Танд энэ өдрийн мэнд хүргэе.

Та өөрийгөө товчхон танилцуулна уу? ‍

Би Данжаадын Болдмаа. Өмнөговь аймгийн Манлай суманд төрсөн. Хөдөлмөрийн эрүүл ахуйч эмч мэргэжилтэй. Хөдөлмөрийн нөхцөлийн үнэлгээний Даблью эйч эй ХХК-ийн үүсгэн байгуулагч,  Ниийгмийн Эрүүл Мэндийн Урьдчилан сэргийлэх салбарт 30 жил ажиллаж байна.

Танай охид хаана сурч байгаа вэ?

Том охин Нинжээ ХБНГУ-ын Вупперталын Их Сургуулийн Product Design мэргэжлээр төгсөх курсэд суралцаж байна. Бага охин Намуударь ХБНГУ-ын Мюнхений Их Сургуулийн Биохимийн анхны курсэд суралцаж байна. Герман улсад дээд боловсрол эзэмших нь үнэгүй бөгөөд хоёр охин маань Гёте сургуулийг төгсөөд DAAD (Германы засгийн газрын тэтгэлэг) тэтгэлэгт тэнцсэн. Энэхүү тэтгэлэг нь сар бүрийн мөнгөн тэтгэмжид байр, замын зардал, сурах бичиг болон эрүүл мэндийн даатгалын бүх зардлыг хамруулдаг. Ер нь Германд амьдрахад хангалттай хэмжээний тэтгэлэг олгодог.

Гёте сургуулийн талаар анх хаанаас сонсож  байсан бэ?

Герман хэл сурах боломжтой сургуулиудыг судалж байгаад Гёте сургуулийг олж мэдсэн.

Та хоёр охиноо Гёте сургуульд суралцуулах шийдвэрт юу нөлөөлсөн бэ?

Германд боловсрол эзэмших зорилготой хүн бүрт DSD1, DSD2 герман хэлний хөтөлбөр чухал тул энэ хөтөлбөрийг Монгол улсад хөгжүүлж буй нь Гёте сургуулийн өвөрмөц давуу тал юм.

Сургуулийн онцлог юу юу байсан бэ?

Сургуулийн орчин хүүхдэд маш нөхөрсөг, дулаан уур амьсгалтай байж, тэдний сонирхлыг илрүүлэх, хөгжүүлэх, чөлөөтэй сэтгэж, өөрийнхөө хүсэл зорилгоо олох боломжийг бүрдүүлсэн байсан.  

Эцэг эхийн зүгээс хамгийн их таалагдсан, мартагдахааргүй дурсамжаасаа хуваалцана уу?

Эцэг эхчүүд багш нартай уулзах уулзалтыг сонирхолтой, өвөрмөц хэлбэрээр зохион байгуулдаг бөгөөд хүүхдүүдийнхээ талаар илүү дэлгэрэнгүй мэдээллийг ганцаарчилсан байдлаар авдаг. Багш нарын баяраар сурагчид багш болж, багш нар нь сурагч болсны дараа охидуудтайгаа ярилцахад тэдний өөрсдийнх нь мэдрэмж үнэхээр гайхалтай байсан, маш их таалагдсан. Зуны нэг сарын вакуумжуулсан сургалтад багаар ажиллаж, герман багш нартай чөлөөт цагаа хамт өнгөрөөх нь хүүхдүүдэд маш өгөөжтэй байсан. Жил бүр Найрамдал зусланд ангиараа амарч, урлаг, спортын арга хэмжээ зохион байгуулдаг. 12-р анги төгсөх үед аав, ээждээ чин сэтгэлийн захиа бичдэг. Энэ бол үнэхээр гайхалтай гоё жишиг. Энэ бүгд миний амьдралд маш сайхан дурсамж болж үлдсэн.

Та DSD1, DSD2 герман хэлний хөтөлбөр болон Кэмбрижийн хөтөлбөрүүдийн талаар ямар сэтгэгдэлтэй вэ?

Германы боловсрол эзэмших нь гол зорилготой хүн бүрт DSD1, DSD2 герман хэлний хөтөлбөрүүд чухал бөгөөд энэ нь Гёте сургуулийн өвөрмөц давуу тал юм. Харин Кэмбрижийн хөтөлбөрийг анх орж ирэхэд, герман хэлний хажуугаар хэт их ачаалалтай байх нь үр дүн гарах болов уу гэж бодогдож байсан. Гэтэл Кэмбрижийн хөтөлбөр нь зөвхөн англи хэлний мэдлэг олгох биш, ерөнхий хичээлүүд, байгалийн ухаан, математикийн гэх мэт суурь мэдлэг, сэтгэн бодох ур чадварыг давхар хөгжүүлдэг маш том давуу талтай байсан.

Гёте сургуулийн сурагчид болон төгсөгч нарт ажиглагддаг хандлага, хүмүүжил, төлөвшил юу байдаг вэ?

Гёте сургуулийн хүүхдүүд бага ангиасаа хамт явсан, эсвэл дунд ангид шилжиж орж ирсэн ч хүүхдүүдийн хооронд ялгаварлах харилцаа огт байдаггүй. Хэт үнэтэй брэнд хувцасаар хоорондоо уралдах зэрэг өсвөр үеийнхний дунд байдаг сөрөг харилцаа ч бас огт ажиглагдаагүй. Тэд багш нартайгаа маш нээлттэй харилцаж чаддаг, орчныг бүрдүүлсэн гэж боддог. Ангийнхантайгаа маш дотно, нээлттэй байдаг нь одоо төгссөнийхөө дараа ажиглагддаг.

Таны охид боловсрол болон хувь хүний хөгжилд Гёте сургуулийн сургалтын хөтөлбөр ямар үүрэг гүйцэтгэсэн гэж та бодож байна вэ?

Бага охин Намуударь нь Кэмбрижийн хөтөлбөрийн хамгийн анхны гэрчилгээтэй төгссөн. Энэ хөтөлбөрт хамрагдсаныхаа дараа IELTS шалгалтыг өгч, 7.5 оноо авсан. Дараа нь ДААД тэтгэлэгт хамрагдах, бусад анагаах ухааны ангид шаардагдах хичээлүүдийн шалгалт өгөхөд тус болсон. Тэгэхээр энэ гурвалсан хөтөлбөр нь зөвхөн хэлний мэдлэг олгох биш, ерөнхий хичээлүүдийн суурь мэдлэг, сэтгэн бодох ур чадварыг давхар хөгжүүлдэг маш том давуу талтай байсан

Ийм ачаалалтай боловсролын орчинд охидууддаа та ямар дэмжлэг өгч байсан бэ?

Бие дааж хичээллэх орчныг бүрдүүлэх, эрүүл мэндийг анхаарах, хоол хүнс, хувцасыг тохируулах, багш нартай нь уулзах, хичээлд нь сууж мэдээлэл авах, охидтойгоо цаг гаргаж ярилцах зэрэг бусад эцэг эхчүүдийн л адил хийж чадах дэмжлэг үзүүлэхийг хичээдэг байсан.  

Таны хоёр охин DAAD тэтгэлэг горилохтой холбоотой олон процесст хэрхэн бэлтгэгдсэн бэ? Тэдэнд чиглэл өгөхөд Гёте сургууль ямар үүрэг гүйцэтгэсэн бэ?

Гёте сургуулиас DAAD тэтгэлэг авсан хүүхдүүдийг жил бүрийн төгсөлтийн баярт танилцуулдаг байсан бөгөөд би ийм боломж олдох болов уу гэж боддог байлаа. DAAD тэтгэлэг авах бүх үйл ажиллагаа 100% Гёте сургуулийн удирдлага дор зохион байгуулагддаг. Гёте сургуулийн багш нарынхаа заавраар, тусгай хөтөлбөрийн дагуу маш их ачаалалтай хичээллэж байсан.

Сургуульд байх хугацаандаа охидуудад нь ямар нэгэн томоохон бэрхшээл тулгарсан уу? Тэд түүнийг хэрхэн даван туулсан бэ?

Том охин Нинжээ Орос 3 сургуулийн 7 дугаар анги хүртэл сурч байгаад Гёте сургуульд шилжиж орох үед тэр жил 8 дугаар анги байхгүй байсан тул шууд 9дүгээр ангид орсон. Эхний жил програмаа нөхөх гэж маш их ачаалалтай байнга илүү цагаар хичээллэж, Гёте сургуулийн багш нартай ганцаарчилсан сургалтууд авч байж гүйцэж авсан.

Бага охин Намууг DSD1, DSD2 шалгалт өгөх үед ковидын хөл хориотой, бүх хичээл онлайнаар орж байсан. Тэр үед манай охин бие дааж, гэртээ маш үр дүнтэй хичээллэсэн. 9-р ангид байх үед нь Гёте сургуулийн захирал П. Хажидмаа ПАД хөтөлбөрт хамрагдах боломжтой хүн нь Намуударь гэдгийг хэлж байсан. Энэ нь охинд маш том итгэл өгч, бусад багш нар ч мөн их итгэл хүлээлгэдэг байсан нь миний охиныг өөрийн зорилгодоо үнэнч, тууштай болгож идэвхжүүлсэн гэж би боддог. Мөн эгч нь ямар их хөдөлмөрлөж хичээллэсний эцэст үр дүн гардаг, болдог гэдгийг харсан тул өөртөө маш их итгэлтэй, хариуцлагатай байсан.

Сургуульд байх хугацаандаа таны охидууд хувь хүний хувьд хэрхэн өссөн гэж та бодож байна вэ?

Нинжээ нэг удаа 9 дүгээр ангид Герман хэлний хичээлдээ хоцроод орсон чинь багш нь зөвхөн Нинжээд зориулж эхнээс нь дахиад заасан гэнэ. Үүнээс хойш би нэг ч удаа хоцроогүй, маш ихэмзэглэсэн гэж тухайн үед ээждээ хэлж байсан. Тэгэхээр жижигхэн зүйл шиг боловч Гёте сургуулийн багш нарын хандлага, харилцаа нь юуны өмнө өөрийгөө хүндлэх, бусдад өөрийгөө зөв ойлгуулах, бусдыг ойлгож харилцах нандин харилцааг төлөвшүүлсэн гэж би боддог. Энэ бүхний үр дүнд манай үг дуу цөөтэй, нээлттэй биш, дуугардаггүй гэж бодогддог охид маань найз нарынхаа дунд өөрийн орон зайг бий болгож, өөртөө маш итгэлтэй, өмнөө зорилготой, зорилгынхоо төлөө тууштай хөдөлмөрлөж чаддаг болж хүмүүжсэн байна.

Гёте сургуулийн германд явуулдаг хөтөлбөрүүд нь таны охидод дэлхийг харах өнцөг болон соёлын ойлголтод хэрхэн нөлөөлсөн гэж та бодож байна вэ?

ПАД хөтөлбөрт Монгол улсаас 3 хүүхэд шалгарч, бага охин Намуударь 11 дугаар анги төгссөн зун шалгарч, бүтэн нэг сар ХБНГУ-аар аялж, герман айлд амьдарч, герман хүмүүсийн соёлтой танилцсан нь миний охины нүдийг нээж, өөртөө улам ихитгэлтэй болж, өөрийн ирээдүйг бүтээх бүх боломж байгааг олж мэдэрсэн. Ингэж охин маань Гёте сургуулийн захирлынхаа хэлсэн тэр ПАД хөтөлбөрийн үр шимийг хүртэж, итгэлийг дааж хүслийг нь биелүүлсэн нь аав, ээж, эмээ, өвөөгийнхөө үнэхээр бахархам, гайхалтай мөч байлаа.

Таны охидын ирээдүйн зорилго юу вэ? Тэдний боловсрол тэднийг эдгээр дараагийн алхамд бэлтгэсэн гэж та бодож байна уу?

Охидууд маань Гёте сургуулийнхаа гайхалтай багш нарынхаа хүчинд маш сайн дээд боловсролыг эзэмшиж байна. Цаашид Монгол улс цөөн хүн амтай, дэлхийн хэмжээнд зэрэгцэж алхахад дор хаяж 2-3 мэргэжил эзэмших хэрэгтэй гэж бид хоёр зөвлөдөг. Тэдний ирээдүй тэдний өөрсдийнх нь гарт байна.

Хүүхдүүддээ Гёте сургуулийг сонгохыг бодож буй бусад эцэг эхчүүдэд та ямар зөвлөгөө өгөх вэ?

Танай хүүхэд зорилготой байна уу? Хэрэв зорилготой байгаа бол өөрийнхөө хүүхдэд итгээрэй. Зорилго байхгүй урсгалаараа явж байвал зорилготой болоход нь туслах арга замыг судлаарай. Тэдний ирээдүй зөвхөн тэдний өөрсдийнх нь гарт байдаг гэдгийг хүүхдүүддээ сайн ойлгуулаарай. Хир хэмжээгээр хөдөлмөрлөнө, тэрхэмжээгээр л үр дүн нь гарна гэдэгт итгээрэй.

Өнгөрсөнгөө эргэн санахад, таны охидын амжилтанд хамгийн ихээр юунд нь бахархдаг вэ?

Гёте сургуулийг сонгох шийдвэрийг гаргасандаа талархаад баршгүй. Энгийн боловч чөлөөтэй, хүүхдүүд хооронд ялгаварлалгүй харилцааг бүрдүүлж, соёлыг бий болгож чадсан эрдмийн далай багш нартаа талархаад баршгүй. Аливаа амжилтын 99% уйгагүй хөдөлмөр гэдгийг ойлгож охидоороо бахархдаг. Бие дааж хичээллэх таатай орчныг охидууддаа бүрдүүлж, зөв чиглүүлж удирдах ухаан хайрласан аав, ээж, өвөө, эмээгийнхээ өндөр босгонд залбирч явдаг.  

Сургууль эсвэл нийгмийн хүрээнд охидуудынх нь амжилтанд хувь нэмэр оруулсан хэн нэгэн ч юм уу, бусад хүмүүст талархахыг хүсэж байна уу?

Намуударийн бага ангийн багш Ц.Энхтуул, 12-р анги төгсгөсөн багш Б.Дэлгэрнаран, Нинжээгийн ангийн багш Ц.Нандинцэцэг, Гёте сургуулийн захирал П.Хажидмаа багшдаа болон бусад бүх багш нартаа эрүүл энх, хамгийн сайн сайхныг хүсье! Бурханд байгаа Галсаа багш маань охидын амжилтад маш их нөлөө үзүүлсэн, гайхалтай жинхэнэ багш хүн ийм л байдаг даа гэж бодож, талархдаг шүү.

2025 оны 3 сарын 12